பவானிசாகர் அணையில் இருந்து நீர் நிறுத்தம்: பொதுப்பணித்துறை

கீழ்பவானி வாய்க்காலின் கரையைப் பலப்படுத்தும் வரை பவானிசாகர் அணையில் இருந்து நீர் நிறுத்தப்படும் என பொதுப்பணித்துறை அறிவித்துள்ளது.

சென்னை: பவானிசாகர் அணையில் போதிய நீர் இருப்பு உள்ளதால், கீழ்பவானி வாய்க்கால் பாசனத்திற்கு நீர் திறக்குமாறு விவசாயிகள் கோரிக்கை வைத்தனர்.

இதனை ஏற்று கடந்த ஆகஸ்ட் 15ஆம் தேதி ஒரு லட்சத்து 3 ஆயிரத்து 500 ஏக்கர் நிலங்கள் பாசன வசதி பெறும் வகையில் முதல் போக நன்செய் பாசனத்திற்கு நீர் திறக்கப்பட்டது.

கரை உடைப்பு

கீழ்பவானி வாய்க்காலில் ரூ.194 கோடி செலவில், கரைகளைப் பலப்படுத்தி கான்கிரீட் அமைக்கும் பணி நடைபெற்று வந்தது. இந்நிலையில் ஆயிரம் கனஅடி வீதம் நீர் திறக்கப்பட்டதால், நசியனூர் அருகே மலைப்பாளையம் என்ற இடத்தில் கீழ்பவானி வாய்க்காலில் கரை உடைப்பு ஏற்பட்டது. அப்போது ஆயிரம் கனஅடி நீர் வெளியேறி விவசாய நிலங்களுக்குள் புகுந்தது.

இதையடுத்து பவானிசாகர் அணையில் இருந்து கீழ்பவானி வாய்க்காலில் திறக்கப்பட்ட ஆயிரம் கன அடி நீர் நிறுத்தப்பட்டது. வாய்க்கால் கரை உடைப்பு ஏற்பட்டப் பகுதியில் உடைப்பை சரி செய்து கரையைப் பலப்படுத்தும் பணி தீவிரமாக நடைபெற்று வருகிறது. இப்பணி நடைபெற்று முடிந்தபின், கீழ்பவானி வாய்க்கால் பாசனத்திற்கு நீர் திறக்கப்படும் என பொதுப்பணித்துறை அலுவலர்கள் தெரிவித்துள்ளனர்.

நாற்றாங்கால் தயார் செய்யும் பணி

எனவே, கீழ்பவானி பாசனப் பகுதிகளில் உள்ள விவசாயிகள் நாற்றாங்கால் தயார் செய்யும் பணியை தற்காலிகமாக நிறுத்தி வைக்குமாறு வேளாண்துறை அலுவலகள் அறிவுறுத்தியுள்ளனர்.

இதையும் படிங்க: ஊரடங்கு நீட்டிப்பு - கடற்கரையில் பொது மக்கள் அனுமதி...